Ауданымызда, мал шаруашылығы, оның ішінде, ет өндіру мәселесіне келгенде, Берік Елубайұлы Егембердиев басқаратын «Меркі-Ет» комбинаты» ЖШС-гін айналып өте алмаймыз. Себебі, ауыл шаруашылығында өзіндік үлесі бар серіктестік мүшелері күн-түн демей еңбек етіп, нәтижелі жұмыстарымен қуантып жүр.
Комбинат малшылары жаздай «Қара қыстақ» тау жайылымын мекен етіп, қарамақтарындағы 8 отар қойды бағып, қоңын көтеріп қайтса, бүгіндері 2 отар қой – Арғы құмда, 6 отары – Орта құмда бағылуда. Малдың қоңы жақсы, қойшылардың үй-жайы жылы, қажетті жағдайлардың барлығы жасалған.
Негізінен, «Меркі-Ет» комбинаты» өңірдегі ет өнімдерін шет елге, дәлірек айтсақ, Дубай мен Бахрейнге жіберіп отырған бірден бір кәсіпорын. Өткен 10 айда бұл елдерге 500 тоннадай ет өнімдері жөнелтілген.
–Серіктестік құрамында: «Нұр-Б», «Олжа» шаруа қожалықтары, Мықандыда мал бордақылау алаңы және ет комбинаты бар. Барлығы 90-дай адам еңбек етеді. Қай кезде болса да, табысқа жетудің бір себебі – маман кадрлар (суретте). Сондықтан да үнемі осы жағына мән беремін, – дейді Берік Елубайұлы, бізбен әңгімесінде.
Шынында да, серіктестіктің бас зоотехнигі, 35 жылдық еңбек өтілі бар – Болат Тәнекеев, 32 жылдық тәжірибесі бар зоотехник – Ердалы Рысқұлов, 35 жылдан бері мал дәрігері болып жүрген – Сайлаубек Жолымбеков… бәрі де аудан шаруашылықтарында көп жылдар бойына еңбек етіп, танылған тәжірибелі мамандар. Маман демекші, ет комбинатының өзінде 3 мал дәрігері, қойда – 1 мал дәрігері, ал, ірі қара малында – 1 мал дәрігері бар. Үлкен ұжымның табыстарды еңсеруінің бір ұшы осында жатса керек.
Сөз соңында айтарымыз: Берік Елубайұлы Егембердиев басқаратын «Меркі-Ет» комбинаты» ЖШС-нің ұжымын кәсіби мерекелерімен құттықтай отырып, еңбектеріне табыс, отбастарына амандық, ел игілігі жолындағы әрбір бастамаларына оңды нәтиже тілейміз.
Қашанда абырой биігінен көріне беріңіздер!
Мереке құтты болсын!
Әтіркүл ИСАЕВА, «Меркі тынысы»